Работниците од Кинеската компанија „Синохидро“- главен изведувач на работите на автопатот Кичево-Охрид, со традиционална вечера и веселба, ја пречекаа Новата 2019 година- година на свињата.

Тие ја прославија новата 2019 година или година на свињата и нагласија дека во Кина, свињата е последниот знак од нивниот хороскоп и е погодна за инвестиции, зголемување на финансиите како и успех на деловен план.

Вработените во „Синохидро“ имаа богата трпеза и убаво украсени простории и како секоја година на трпезата беше традиционалната кинеска храна, а меѓу другото трпезата беше збогатена со овошје, зеленчук, јагнешко во мед, риба, пилешко и секако кинески ориз и многу други специјалитети од кинеската кујна. Оваа година не беше организиран традиционален огномет, бидејќи многу работници беа вратени во својата земја.

-И покрај тоа што одморот на добар дел од нашите работници се поклопи со Новата година и тие се наоѓаат во родната земја, сепак ние преостанатите работници свечено ја пречекавме Новата година.

Иако сме далеку од родната Кина, сепак заедничката дружба, традиционалните јадења и програмата што ја следиме од нашата земја, барем накратко ни овозможуваат да имаме чувство како да сме меѓу своите. Годината на свињата носи љубов, среќа и оптимизам.

Инаку годината на свињата според нашата Нова година започнува на 5 февруари и ќе трае до 24 јануари 2020 година- вели Ше Хуанмин, одговорен за највеселата ноќ.