На големо се рушат дивоградбите во општина Охрид кој се бори за да не го загуби статусот на заштитено подрачје од  УНЕСКО.

Ова е веќе втора недела како тече акцијата за уривање, а некои од сопствениците на платформите крај брегот на Езерото и самите почнаа да ги одстрануваат терасите навлезени во водите.

И сопственикот на едно од најпознатите локали во Охрид, „Аквариус“ реши самиот ја отстрани платформата. Тоа не го сторија и другите, па денеска со асистенција на полицијата се отстрануваат и терасите од угостителските објекти „Момир“ и „Ликвид“. Улицата која води кон овие објекти на брегот од Езерото е затворена од полицијата со образложение дека се изведуваат градежни работи, објави 24 инфо.

По одстранувањето на нелегално изградените платформи општината Охрид ќе изготви трошковник и истиот ќе им го достави да го платат сопствениците на угостителските објекти.

Инаку пред неполни две недели охридските градски власти започнаа со рушење на дивоградбите и донесоа одлука за ставање на крај на безаконието и рушење на сите дивоградби во заштитеното подрачје и околината на градот.

Инаку, во Охрид се регистрирани над 1000 дивоградби од кои дури 409 се во заштитеното подрачје. Поради ова, до општина Охрид беа испратени сериозни забелешки од УНЕСКО и постои реална закана градот, поради дивоградбите да го загуби својот статус во угледната организација.