Српскиот претседател Александар Вучиќ беше гостин во утринската програма каде имаше дебата со познатата водителка Јована Јоксимовиќ на тема загадувањето во Србија.

Вучиќ вели дека загадувањето и загадениот воздух се користат за политички цели и дека се прави голема фама без потреба.

-Трите деца ми живеат во најзагадениот дел во Нов Белград. Малиот Вукан редовно го шетаме надвор најнормално. И мене така ме шетаа. Се работи за хистерија. Не живеат моите деца којзнае каде туку овде. Пијат исто млеко дишат ист воздух-објасни Вучиќ.

Инаку вчера според најновите податоци на сајтот Ер Вижуал, кои го прикажуваат загадувањето во светот Белград беше најзагаден град во Европа, петти најзагаден град во светот.

Индексот за квалитет на воздухот се влошува. Во Ваљево, според податоците на Агенцијата за заштита на животната средина, концентрацијата на ПМ-10 и ПМ-2,5 честици надминува 300 нанограми на метар кубен и тој град е означен дека има „многу нездрав воздух“, а утринава спаѓаше во категоријата „опасен по здравјето.“

Надлежните од Министерството за здравство и Институтот за јавно здравје на Србија „Д-р Милан Јовановиќ Батут“ по оваа вест вчера порачаа дека нема потреба од паника. Тие потсетија дека должност на граѓаните е да се придржуваат до мерките за заштита.

– Ова ги вклучува луѓето со хронични респираторни заболувања и со кардиоваскуларни заболувања, мали деца и постари лица, порачаа од Батут.