Едно дете се наоѓа во кома на КАРИЛ, откако денес во паркот Делфина во скопската населба Влае се повредило играјќи си на таканареченото игралиште за инклузивност, дознава Инфомакс.

Малиот Ангел, од ОУ „Димо Хаџи Димов“ денес, играјќи се во паркот Делфина во скопската населба Влае, на таканареченото игралиште за инклузивност, се здобил со тешка телесна повреда.

Во моментот е на КАРИЛ во коматозна состојба.

До повредата дошло откако на игралиштето кое е наменето за деца со хендикеп, малиот Ангел влегол и почнал да се лула на лулашка која е наменета за деца во количка. Ова значи дека лулашката е поголема од стандардните и тешка неколку стотина килограми.

Ненадгледуван од никого, Ангел почнал да се лула кога ја заглавил ногата во лулашката и паднал, а до повредата дошло кога седиштето кое е предвидено да собере количка за хендикепирани лица се вратила назад и го удрила момчето во пределот на вилицата, по што тој изгубил свест.
Од она што го дознава Инфомакс, детето е на КАРИЛ и е во тешка состојба.

На ова игралиште ова не е прв случај во кој се повредени ученици. Минатата недела имало три случаи во кои за среќа полесно биле повредени неколку дечиња, но општината се уште нема изнајдено соодветно решение за обезбедување на ова игралиште, кое доколку не се користи соодветно и за намената за која е предвидено, е опасно по здравјето на учениците.