Затруени граѓани од скопска сендвичарница завршуваат на инфузија во болница. Деновиве голем број лица се пожалија на висока температура, дијареа, грчеви во стомакот откако како што тврдат јаделе во Гранд Бургер, дознава Сител.мк!

Голем број од нив купиле од храната за време на викендот и по неколку часа настапило труењето. 19 годишниот Мартин Ливрински за Сител сведочи дека  јадел хамбургер заедно со својот другар, па веднаш потоа добил силни грчеви во стомак кои го разбудиле по што почувствувал и висока температура. Помош побарал во приватна болница.

Мартин се уште не се чувствува добро иако поминале 4 дена.

Меѓу затруените се Инес Ефремова и нејзиниот сопруг. Нарачале по телефон хамбургери со помфрит за дома во саботата.Истите симптоми ги почувствувале рано утрото и прво се посомневале на вирусот Ковид 19. Помош побарале во брзата помош а оттаму ги упатиле во ургентниот центар на болницата 8 септември а потоа на клиниката за Токсикологија.

На Токсикологија, околу 22:30 часот исто ни потврдија дека повеќе луѓе од “Гранд бургер” пријавиле труење дента и веднаш ме примија. Таму се онесвестив,па примив кислород и три шишиња инфузија и ме задржаа до 7 часот следниот ден. Сега сум дома, уште се чувствувам лошо и чекам резултати од копрокултура за да се потврди конкретната бактерија, изјави Инес Ефремова.

Труење од сендвичите на гранд бургер имаат и мали деца. Бројни реакции стигнуваат преку социјалните мрежи. Од Државниот санитарен и здравствен инспекторат велат дека до сега нема пријава од скопскиот центар за јавно здравје за случајот со труењето за да излезат на терен и времено да ја затворат сендвичарницата. Не јасно е зошто никој не реагирал за случајот и кој потфрлил по толкав број на пациенти кои тврдат дека со симптоми на труење завршиле во болница. Додека здравствените служби чекаат официјална пријава од АХВ веќе постапиле.

И АХВ тврди дека не добиле официјално известување од здравствените институции за труењето.