Талат Џафери претседателот на Собранието прати допис до Комисијата за мандатно-имунитетни прашања во кое ја известил комисијата дека пратеникот Никола Груевски неоправдано е отсутен од седница на Собрание повеќе од шест месеци.

Поранешниот премиер и лидер на ВМРО-ДПМНЕ Никола Груевски, беше прогласен за виновен во случајот на (СЈО) познат како „Тенк“ кој се однесува на набавката на луксузниот блиндиран „мерцедес“. Груевски беше осуден на две години затворска казна.

Моментално од Собранието известуваат дека се започнува постапката за одземање на мандатот на пратеникот Никола Груевски, кој моментално се наоѓа во бегство во Будимпешта. Од партијата на ВМРО-ДПМНЕ изјавуваат дека Груевски не е неоправдано отсутен, туку политички прогонет од самата власт, предводена од премиерот Заев.

За одземање на мандатот на Груевски е потребно двотретинско мнозинство.

Според член 59 од собранискиот Деловик, за пратеникот кој неоправдано отсуствувал од седниците на Собранието повеќе од шест месеца, претседателот на Собранието ја известува Комисијата за деловнички и мандатно-имунитетни прашања. Предлог за одземање на мандатот на пратеник во овој случај, поднесува Комисијата за деловнички и мандатно-имунитетни прашања, во рок од 15 дена од денот на добивањето на известувањето од претседателот на Собранието, а по нејзиниот предлог за одземање на мандатот на пратеникот, Собранието води претрес на првата наредна седница.
Како што се наведува во членот 59, претресот може да заврши со донесување одлука за одземање на мандатот на пратеникот или со заклучок дека нема елементи за одземање на мандатот на пратеникот.