Грчката полиција денеска објави дека запленила 500.000 таблети дрога екстази во Солун и уапсила три лица.

Операцијата беше извршена вчера, а вредноста на таблетите на црниот пазар беше проценета на 10 милиони евра.

Полицијата прво уапси 56-годишен возач на камион во кој пронашла 180.000 апчиња. Полицијата веднаш потоа запрела и автомобил во кој пронашла уште 320.000 таблети екстази.

Уапсила и двајца Ирачани, на возраст од 49 и 52 години, од кои едниот е жител на Холандија, а другиот на Грција.

Апчињата очигледно биле произведени во Западна Европа и биле наменети за грчкиот и веројатно турскиот црн пазар, изјави неименуван полициски службеник.

Полицијата трага и по друг возач на камион.