Грчкиот премиер Киријакос Мицотакис најави дека земјата ќе ги отвори своите граници за странските туристи на 1 јули, доколку ситуацијата во врска со вирусот корона оди според планот.

Ќе го отвориме туризмот на 1 јули, ако биде исправно и за оние кои сакаат да патуваат и за нашата туристичка индустрија- рече Мицотакис на онлајн конференцијата на Консалтинг групата во Бостон, на која учествуваа 500 лидери.

Тој изрази уверување дека правилното управување со пандемијата на вирусот корона ќе доведе до побрзо економско закрепнување, пренесува АНА.

Тој додаде дека програмата за инвестирање ќе продолжи според планираното и повика на поголеми напори во борбата против климатските промени.

Овој викенд Грција ќе отвори 515 организирани плажи, што се смета за клучен тест во борбата за започнување на туристичката сезона.

Спортот, музиката и алкохолот ќе бидат забранети на плажите, а според советите на експертите, поради физичката оддалеченост, ќе бидат дозволени само 40 лица на 1.000 квадратни метри.

Предвидени се парични казни од пет до 20 000 евра за непочитување, кои ќе бидат тројно ако се повтори делото, најави заменик-министерот за безбедност Никос Хардалиас, додавајќи дека компаниите кои не го почитуваат законот ќе бидат затворени прво на 30, а потоа на 90 дена.

Туризмот се проценува дека учествува со 25 проценти од БДП на Грција.