Претседателот на Врховниот суд, Јово Вангеловски, изјави дека е донесено начелно мислење дека СЈО по 30 јуни 2017 не смее веќе да биде овластен покренувач на нови истраги и обвиненија, а дека ова мислење ќе биде задолжително за кривичните судии во Врховниот суд, и тие немаат друг избор освен да поништат пресуда која би се донела за ваков предмет на Основен суд или на Апелационен суд. Ова значи дека СЈО е во судско-обвинителски аут, односно, може да ги води веќе започнатите предмети, но не може да отвара други.
Сето ова, случајно или не, се збиднува откако се заврши главната операција во земјата, сменета влада, сменет Устав, занемарен референдум, политичка пресуда за “Мерцедесот“ што за владата го купил Груевски, а Груевски е веќе на безбедно во ЕУ и НАТО членка, во Унгарија. Дали СЈО му беше некому потребно за навистина да се дојде до правда, ред и одговорност, или пак целата оваа скапа операција беше операција за политичките потреби за редефинирање на државниот Устав?
За формирањето на СЈО во опозиционата ВМРО-ДПМНЕ викаа дека е продолжена рака на СДСМ, а како институција дека троши 4 милиони евра годишно. Самата Катица Јанева потврди дека си го вработила нејзиниот внук во СЈО. Обвинителката Бети Јосифоска си ја вработила ќерката Елена, плус двајца роднини од Кичево во СЈО. Во СЈО исто така е вработен и синот на врховната судијката Лидија Неделкова, како и првиот братучед на обвинителот Гаврил Бубевски. Јанева таму ја вработила и ќерката на обвинителот Коле Штерјев, кој како претседател на Советот на обвинители и е директно претпоставен на Јанева. Во ова обвинителство е вработена и Берниса, ќерка на Есад Рахиќ, висок функционер на СДСМ. Инаку платите на обвинителите во СЈО се движат околу 2.500 евра, додека другите вработени со факултет примаат од 45-75.000 денари.
Сега СЈО е ни на небо, ни на земја!
Ги нема веќе тие бомбастични прес конференции на кои Фатиме Фетаи, со дебел слој на кармин како на еротските филмови, најавува притвори, пресуди, овиненија, и збори за правда и одговорност на недопирливите Мијалков, Груевски, Елизабета Канческа, Бујар Османи, Ејуп Алими, Али Ахмети и Камчев.
Недопирливите, по се изгледа си останаа недопирливи за правдата, а скапата милионска забава, платена од џебот на македонските граѓани, полека завршува. Сега и самите вработени во СЈО си го бараат својот кариерен пат и се надеваат дека ќе бидат вклопени во државното обвинителство, за да можат да имаат редовна плата и следна можност за кариера. И на крајот во звучните предмети “Таргет“, “Тврдина“, “Тендери“, “Империја“, “Тортура“ изгледа ќе настрадаат само по некои “мали риби“, како сиротиот службеник од МВР, Ѓоко Поповски, кој немаше ни да знаеме дека постои на светов доколку во случајот “Тенк“ не добиеше шест години затвор. И сега сите се задоволни, и СДСМ и ВМРО-ДПМНЕ и ДУИ, никој не се буни. Па дури и СЈО премолчено си ја прифаќа судбината на епизодна институција која имала малку обвинителска, и малку политичка улога. А граѓаните, не се битни! Граѓаните нека бидат задоволни доколку после ставот на Врховниот суд нема да мора од буџетот на државата да се исплаќаат оштети од стотици илјади евра на споменатите недопирливи политичари. Битно Катица Јанева со 3.000 евра плата веќе почна да оди на третман за нега на коса и лице кај модниот стилист Дадар. Што има врска што тоа не може да си го дозволат вработените административци во судовите или пак наставничките од основните училишта. Треба да се знае, кој плаќа, а кој пие!
»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.
You must be logged in to post a comment.