Откако пред една година беше најавен проектот за посадување дрвце за секое новороденче, „Дрво за секое дете“ конечно вчера беше и реализиран. 

Вчера, градоначалникот на Град Скопје, Петре Шилегов присуствуваше на посадувањето на дрвцата на кои стојат имињата на 20 новороденчиња, но и нивниот датум на раѓање.

Првите плочки со имиња на новороденчиња беа поставени на новиот дрворед зад стадионот на Армијата, до Кејот на реката Вардар. Плочките се напишани на јазикот кој го одбрале родителите.

„Заедно со родителите на пријавените дечиња, почна проектот „Дрво за секое дете“ што го работиме заедно со ЈП „Паркови и зеленило“ и гинеколошко-акушерските болници во Скопје. Во наредниот период уште 300 дрвја во градските дрвореди и паркови ќе добијат плочки со имиња на новородените деца во чија чест е засадено тоа дрво. Особено се радувам што овие деца ќе растат истовремено со дрвјата и ќе можат да го следат растот на своето дрво. Со тоа, на симболичен начин сакаме да создадеме врска меѓу градот и неговите сегашни и идни граѓани“, рече градоначалникот Петре Шилегов.