Во неделното интервју на Радио Слободна Европа претседателот на ДИК, Оливер Деркоски изјави дека доколку на престојните избори во април нема доволно излезеност, или пак доколку има втор круг, а нема излезеност од 40 проценти, нема да биде исполнет условот за успешни избори.

Дерковски изјави дека во тој случај веднаш ќе бидат распишани нови избори, односно претседателот на Собранието треба да распише нови избори на кои може да учествуваат и сегашните кандидати доколку се поддржани од група на избирачи или од најмалку 30 пратеници  но може да има и нови кандидати.

Деркоски истакна дека  ДИК  во изминатиот период ги презела сите потребни организациски мерки за спроведување на фер и демократски претседателски  избори.

– Без разлика дали тие се или не се услов за добивање на датум за преговори со ЕУ, ние и онака како државен орган ги спроведуваме сите потребни мерки за да се организираат кристално чисти избори. Меѓутоа, тука морам да нагласам дека изборниот процес се содржи од повеќе чинители, значи не е само Државната изборна комисија. Да, ДИК е орган кој се грижи за организацијата, спроведувањето на изборниот процес, како еден од тие чинители, меѓутоа во случајот со претседателските избори имате ситуација во која на пример кандидатите, организаторите на кампањите кои исто така ќе треба да внимаваат на изборниот процес да биде фер, коректен, чист за да помине сè во најдобар ред на крајот – вели Деркоски.