Сопругот на актуелната министерка за правда, Рената Дескоска, Тони Дескоски професор по меѓународно право на Универзитетот “Свети Кирил и Методиј” во Скопје пропаднатиот референдум го толкува како половина пропаднат Договор од Преспа.

Имено Дескоски неколку пати јавно проговири за Договорот од Преспа но и референдумот за промена на името, при што појасни дека за промена на името треба да се извршат Уставни промени што би значело нова држава но и истакна дека не е можно да се направат Уставни измени со промена на името без да се изврши промена на идентитетот.

Неговата последна анализа е поврзана со пропаднатиот референдум за кој Дескоски напиша:

Денеска гласавме. И покрај сите полемики, моето мислење е дека прашањето беше кристално јасно. Кристално јасно е и дека на референдумот немаше доволен број на граѓани кои би се изјасниле на поставеното прашање.

Сега, кога имаме неуспешен референдум , чувствувам потреба да укажам на една одредба од Преспанската спогодба, која во значителна мерка може да влијае на идните постапки.

Имено, во чл. 2 став 4, точка б, алинеја 2 (втора,трета и четврта реченица), изречно е пропишано дека поддршката на Грција за наше зачленување во НАТО е условено од исполнувањето на два кумулативни услови: прво, од исходот на референдумот (кој мора да е конзистентен со Спогодбата) и второ, усвојувањето на Уставните амандмани (четири на број).

Тоа значи дека без исполнување на било кој од двата услови, Грција нема да има обврска да не поддржи за членство во НАТО. Тоа пак значи, дека дури и да ја ратификуваат Преспанската спогодба во нивниот парламент, ние ќе бидеме во нивна милост или немилост, за тоа дали ќе не пропуштат во НАТО.

Грција секогаш ќе може да се повика на неуспешниот референдум, и совршено правно засновано да одбие да го ратификува протоколот за наше пристапување во НАТО. Тогаш, ниту Меѓународниот суд на правдата нема да пресуди за нас. Оттука, пред да се пристапи кон уставни измени, укажувам на опасноста со која се соочуваме, дури и ако амандманите бидат усвоени. – напиша професорот.