Директорот на ЗОО-Градина во Скопје, Ѓорѓи Галетановски Чомбе, преку своите навреди кон иселениците, нарекувајќи ги “гнаси на кои треба да им се одземат пасошите“, свесно или не, навреди и многу семејства на јавни личности во државава и вон неа. Имено, иселеници од Македонија во странство се и сопругата и децата на министерот за надворешни работи Никола Димитров, кои работат, се школуваат и живеат во Хаг, каде имаат и свој стан. Иселеник е и ќерката на Али Ахмети, која повеќе години живее и работи во Австрија.

Иселеник од 1985 година е и Милчо Манчевски, најпознатиот македонски режисер, кој живее и работи во Њу Јорк, исто како и неговиот колега Дарко Митревски (филм “Трето полувреме“) кој живее во Лос Анѓелес. Иселеници се и сестрата и внуката на новинарот Борјан Јовановски, кои живеат и работат во Брисел. Иселеник е и Проф. Петар Поповски, охриѓанец кој живее во Данска, предава на универзитетот во Алборг и два пати бил добитник на данската кралска награда за наука и истражување. Иселеници се и Димитар Морарцалиев, познат адвокат од Женева, како и Роберт Милески (стружанец) кој е сопственик на успешна компанија за софтвер во Германија.

Сите овие луѓе на свој начин и помагаат на Македонија и се поврзани со неа. Сите овие иселеници направиле многу повеќе од Ѓорѓи Галетановски Чомбе за Македонија. Затоа се поставува прашањето кој е Чомбе, како е дојден до така висока директорска позиција, како има добиено диплома и од каде, од каде таа ароганција и злоба, и кој му дал за право да навредува и омаловажува македонски државјани, а при тоа да зема државна плата од буџетот во чие полнење голем придонес дава и македонската дијаспора? Добро рече некој, на Заев не му треба метла, туку “Кирби правосмукалка“ за да ги исчисти ваквите квази-директори кои сеат само омраза и поделби меѓу народот.