Времето денеска ќе биде сончево, утрото свежо, а во текот на денот топло со слаб ветер претежно од источен правец, информира УХМР.

Минималната температура ќе се спушти меѓу 0 и 7, а максималната ќе достигне од 22 до 29 степени.

Во Скопје ќе биде сончево. Температурата ќе се двжи од 5 до 26 степени.

До вторник ќе се задржи сончево време со натпросечни дневни температури за овој период од годината. Промена на временската состојба со наоблачување и намалување на дневната температура се очекува од среда.

Почнувајќи некаде од средината на следната недела и тоа од северот на Балканскиот Полуостров, ќе започне влијанието на новиот циклон кој е во најава. Циклонот Луцијан ќе ја погоди и Македонија, информира метеорологот Славчо Попоски. Истиот ќе донесе врнежи од дожд, снег на планините, голем пад на температурите и ветер. Снежната граница ширум регионот можно е да се спушти дури и на помала надморска височина.

Кај нас овој циклон ќе го почувствуваме веќе некаде од 31 октомври кога ќе настапи промена на времето и ќе растат условите за врнежи од дожд како и условите за локална нестабилност.

Сето ова ќе биде проследено најпрвин со јужен, а потоа и со северен ветер кој ќе предизвика голем пад на температурите на воздухот па така на планинските места и тоа особено на северозапад и запад врнежите од дожд се очекува да поминат во врнежи од снег.

Локално се очекува и позначително количество на воден талог па така конечно долготрајната суша барем судејќи според моменталните излези на нумеричките модели значително ќе се ублажи.