Адвокатот на првообвинетиот во случајот Рекет, Бојан Јовановски денеска за медиумите изјави дека Боки 13 кој вчера на судењето изјави дека му е дијагностициран канцер на желудникот, поднел барање за замена на мерката притвор.

Имено Боки побарал да биде пуштен во домашен притвор поради здравствената состојба во која се наоѓа, а како главни причини ги посочил, несоодветните хигиенски услови во затворот Шутка каде се наоѓа во моментот.

– Поднесовме ново барање до Кривичниот совет на Основниот суд – Скопје за преиспитување на постоењето на околностите за понатамошно задржување на обвинетиот во ефективен притвор. Притоа ги дадовме последната дијагноза и медицински извештај, кои датираат од 4 февруари. Тоа се нашите аргументи за укинување на притворот, изјави адвокатот на Боки 13, Сашо Дуковски.

Посочи дека постапката за укинување на притвор е итна постапка и очекува во текот на следната недела да се одлучи.

Иако Боки 13 претходно најави дека доколку при прегледите во 8-ми Септември, се докаже дека тој има канцер на желудникот ќе поднесе тужба против приватната клиника „Систина“, сепак Сашо Дуковски вели дека таква тужба не е поднесена. 

– Ќе следат правни поднесоци во тој правец, не заради ова што се кажува, туку блиску до тоа. Затоа што се работи за некоја операција која што при консултација со врвни експерти од таа област е констатирано дека не е изведена според правилата на струката. Тоа го велат луѓе кои изведувале илјадници такви операции и во тој правец би следела евентуална постапка, изјави Дуковски.