Најмалку 17 лица, меѓу кои и странски туристи, се ранети денеска при експлозија на бомба крај туристички автобус во близина на египетски музеј, што се гради во реонот на познатите пирамиди во Гиза, Египет.

Египетските безбедносни сили го потврдија денешниот напад. Нападите врз египетските безбедносни сили и припадниците на христијанско малцинство зачестуваат во Египет по соборувањето од власта на претседателот – исламист Мохамед Морси во 2013 година.

– Експлозивна направа беше активирана покрај ѕидот на музејот, изјави за ДПА претставник на безбедносните сили, кој побарал анонимност.

Никој до сега не презеде одговорност за нападот, изведен со поставена експлозивна направа, која била активирана кога крај неа минувал автобус со странски туристи.

Ројтерс јавува дека меѓу повредените туристи има Јужноафриканци. Не се знае колку се повредени, и не се знае дали има од други националности меѓу повредените во денешната експлозија.

Засега нема информации за загинати. Сведокот Мохамед ел Мандух за Ројтерс изјави дека слушнал „силна експлозија“. Фотографиите објавени на социјалните мрежи прикажуваат автобус со искршени прозорци и парчиња на патот.