Во Вила Водно, амбасадорот на ЕУ во ѕемјава Самуел Жбогар, по предавањето на Извештајот на Европската комисија рече дека, во Извештајот кој денеска го презентирал се зборува за промените и навистина му е драго што се јавуваат промени во начинот на размислување, а ништо не го потврдува тоа од денешниот состанок на кој на една маса имал претставници од сите политички партии и сите засегнати страни кои зборуваат за иднината на оваа држава во Европската унија.

Евроамбасадорот рече дека државата е подготвена токму сега да ги започне преговорите. Тој истакна дека работата не треба тука да престане, реформите треба да продолжат и очекува ентузијазмот да продолжи и во иднината. 

„Република Северна Македонија е навистина уникатна држава во Западен Балкан, уникатна е на посебен начин. Собранието е единствениот парламент во регионот во кое опозицијата и власта седат заедно внатре и дискутираат за законите кои треба да ја подобрат државата и судството, но и единствената земја во регионот која нема никакви проблеми со соседите, туку напротив развива многу добри односи со нив и тоа не само со соседите, туку со сите земји во регионот“, истакна Жбогар.

Високата претставничка за надворешна и безбедносна политика на ЕУ Федерика Могерини на презентацијата на „Пакетот проширување, рече дека врз основа на строга и фер проценка, оваа година по вторпат Европската комисија препорачува отворање преговори со Албанија и со Северна Македонија.

„Северна Македонија и Албанија ја прифатија можноста и ги спроведоа реформите. Историскиот Преспански договор со кој се става крај на спорот за името со Грција и зајакнување на добрососедските односи, како што беше направено со Бугарија, е нешто што сите го цениме, го признаваме и го вреднуваме како историска пресвртница, на само за земјата, туку и за регионот“, изјави Могерини на денешната заедничка прес-конференција со еврокомесарот за проширување Јоханес Хан.