Повеќе од два часа, со една пауза, трае средбата очи в очи меѓу водачите на двете најголеми партии во земјава, премиерот Зоран Заев(СДСМ) и Христијан Мицкоски (ВМРО-ДПМНЕ), во Клубот на пратеници во Скопје.

Првпат по формирањето на новата влада на СДСМ и ДУИ, Заев и Мицкоски седнаа на иста маса, овој пат без придружници од нивните табори.

Заев влезе на средбата со најава за можен договор за пролонгирање на пописот, чија теренска фаза треба да почне в четврток, без да посочи можни нови термини. ВМРО-ДПМНЕ, пак, деновиве побара пописот да се одложи најрано до септември.

На лидерската средба е договорено да се одложи пописот, наместо во април ќе се одржи во септември, изјави Мицкоски!

„Имав дијалог со премиерот Заев и постигнавме договор за одложување на пописот за септември, во периодот меѓу 5-ти и 30-ти септември. Исто така имавме дијалог и за пролонгирање на локалните избори, за втората половина на октомври“, изјави претседателот на ВМРО-ДПМНЕ, Христијан Мицкоски по лидерската средба со премиерот во Клубот на пратеници.