Денес за првпат во тридецениското постоење на плурализмот во Македонија токму членовите на СДСМ избираат претседател на директни внатрепартиски избори, порача партискиот лидер и премиер Зоран Заев, кој единствен кандидат за уште еден четиригодишен мандат.

„Заедно испишуваме историја практикувајќи највисоко ниво на внатрепартиска демократија.

Ова е нова, додадена вредност, нов стандард на македонската политичка сцена, поставен од најдемократската, најпрогресивната, модерна и европска партија – СДСМ“, напиша Заев на фејсбук, откако и тој го искористи правото на глас.

Гласаат вкупно 68 999 членови во над 200 избирачки места во 80 општински организации на партијата. Во услови на пандемија поради Ковид 19 од избирачките одбори тврдат дека се почитуваат здравствените протоколи, а речиси половината од партиското членство гласало до пладне.

На внатрепартиските избори гласаа и партиските функционери. на своите Фејсбук профили статуси споделија и министерот за здравство Венко Филипче, министерката за одбрана Радмила Шекеринска, вицепремиерот за борба против корупцијата Љупчо Николовски.