По вчерашната неуспешна лидерска средба која траеше до доцна во ноќта, премиерот Заев во изјава за Телма истакна дека е разочаран од исходот.

-Разочаран сум од исходот на лидерската средба. Имав некоја надеж дека е можно да ја сменат матрицата и да излезат од заложбите на своите претходници. Се потрудивме да излеземе во пресрет, но ВМРО-ДПМНЕ единствено бара предметите на СЈО да дојдат под нивна контрола, да запрат сите предистраги и истраги, криминалот да го заташкаме. Тоа не смееме да го дозволиме, рече Заев додавајќи дека  правда и правна држава мора да има и ќе има.

Според него  предметите од СЈО ќе продолжат да се процесуираат. 

Лидерската средба на лидерите на СДСМ и ВМРО-ДПМНЕ Зоран Заев и Христијан Мицкоски вчера траеше повеќе од 7 часа. Пред средбата сите беа оптимисти, но договор нема. Нема ни инфомација дали е закажана уште една средба.

На синоќешната средба тимот на СДСМ предложил да се формираат две обвинителства – обвинителство за висока корупција и да ги гони именуваните функционери, а шефот на ова обвинителство да го предлага опозицијата и Обвинителството за гонење наорганизиран криминал останува. Ова за ВМРО-ДПМНЕ било неприфатливо.

Во новото обвинителство, било предложено, да влезат сите обвинители од СЈО. Предлогот на Заев значи и тоа дека ова ново обвинителство би требало да почне да функционира по парламентарните избори, а тоа значи дека случајот „Рекет“ останува во надлежност на Вилма Русковска од Обвинителството за гонење на организиран криминал.