Славе Петров од Кочани почна со подготовка на нивите за сеидба. Тој наместо со трактор 44 хектари ора со помош на своите мазги. Станува збор за семејна традиција од преку седум децении. Орањето е потешко и трае подолго, но се намалуваат трошоците. Годинава заштедата во овој дел ќе биде уште поголема поради високите цени на горивата.
Но, тешко дека мазгите на Славе ќе може да го изораат цело кочанско поле бидејќи голем дел од земјоделците велат дека годинава нема да ги стартуваат тракторите. Не им се исплати. Поскапе нафтата, ѓубривата се покачија за над 200 проценти, па пред стартот на сеидбата на оризот многумина се уште прават есап дали воопшто да влезат во нивите.
Прогнозите на земјоделците се дека растот на цените на горивата, ѓубривата и пестицидите за 30 проценти поможе да го намали производството на ориз во Кочанско, но и да се одрази на квалитетот на пченицата, ако поради високите цени земјоделците се одлучат да штедат на прихрана.
„Оваа година можно е да има помали приноси доколку не бидат довлно прихранети посевите. Ако природата не сака тогаш може да се дојде до количините на кои се надеваме, но реално е, без ѓубрива, приносите да бидат намалени“ – велат од Асоцијацијата на земјоделци.
Владата пред неколку дена одобри два милиони евра од интервентниот фонд за исплата на дополнителна субвенција за минерални ѓубрива за производителите на пченица и јачмен, како најзначајни стратешки култури.
Цените и недостигот од ѓубрива сериозно го погодува земјоделството бидејќи Русија е еден од најголемите производители на клучните состојки во вештачките ѓубрива. Аналитичарите велат дека е можно нормализирање на светскиот пазар само ако во јуни, Кина почне со извоз на фосфати.
»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.
You must be logged in to post a comment.