Во својата изборна програма СДСМ запиша дека се залага за изборен модел каде цела Македонија ќе биде една изборна единица, но засега сеуште не превзема посериозна иницијатива тоа да го предложи. Како своја претходница за ваквиот изборен модел СДСМ пушти во јавноста неколку свои помали коалициони партнери (ДОМ, ЛДП и Амди Бајрам), а нив им се прилкучија и Мирослав Јовановиќ од коалиционата Српска странка во Македонија, како и Самка Ибраимовски од коалициона партија ПЦЕР. Овие пратеници кои се дел од владеачката коалиција тврдат дека сегашниот пропорционален изборен модел со 6 изборни единици е неповолен за малите партии и дека нивните партии не можат да дојдат до израз. Сепак, за волја на вистината, дел од овие пратеници, како на пример Амди Бајрам од Сојузот на Ромите и Лилјана Поповска од ДОМ, и самите заборавиле колку долго се пратеници во Собранието на Македонија. Затоа се поставува прашањето дали Лилјана Поповска, Амди Бајрам и Мирослав Јовановиќ навистина имаат искрени намери за подобар изборен модел или оваа нивна иницијатива е само потег кој се изведува во координација со владеачката СДСМ?!

Истовремено, дека усогласувањето на заеднички став за поинаков изборен модел ќе оди тешко, говори и разногласието кое е застапено кај другите политички партии. На пример, опозиционата ВМРО-ДПМНЕ, иако официјално сеуште не се изјаснила по најновите идеи на помалите владини партии, сепак пред некој ден пратеникот Антонијо Милошоски изнесе лично мислење дека доколку целта е да се избере пратеник со посилен личен интегритет, кој ќе биде примарно одговорен кон своите избирачи, тогаш мнозинскиот изборен модел е концепт што е соодветен. Македонија имаше мнозински изборен модел од 1991 до 2002 година. 

Од друга страна, партиите на Албанците во Македонија имаат различни видувања. Владеачката партија ДУИ, според ставот на Тахир Хани изнесен за ТВ Алсат, е дека ДУИ поддржува избори со отворени листи, но со шест изборни единици, како што е сега. “Мислам дека пропорционалниот систем со отворени листи и шест изборни единици нуди можност да имаме парламент со поквалитетни пратеници. Иницијативата за една изборна единица од страна на малите политички партии, во минатото докажа дека малите партии изнесуваат идеи во име на поголемите македонски партии“, изјави Тахир Хани од ДУИ.

Од Алијансата за Албанците предлагаат систем со осум изборни единици, бидејќи како што велат, така на важност би добил гласот на секој граѓанин. Според Алијансата, моделот со една изборна единица е неприфатлив затоа што со него Албанците би изгубиле дел од гласачката тежина. “На пример, кој ми гарантира дека ќе биде заштитен гласот на места каде што комисиите ќе бидат само од ВМРО ДПМНЕ или СДСМ. Мене никој не ми дава гаранција дека таму нема да се полнат кутиите за да се постигне цензусот до тој степен, до кој албанскиот глас да не може да се преточи во мандати“, изјавува Ремзи Мемеди, претставник на Алијанса за Албанците. Движењето БЕСА предлага систем со три изборни единици бидејќи сегашниот изборен модел го сметаат за несоодветен. Според оваа партија, има општини со бројно албанско население кои се поделени во две изборни единици, како Чаир, Кичево и Дебар. “Впечаток кај гласачите Албанци е дека шестата изборна единица е показател дека Албанците се оштетени со овој изборен модел, бидејќи секој изборен циклус автоматски се одделува половина од градот Дебар и во вакви околности ние постојано правиме концесија на штета на албанскиот глас“, изјави Арианит Хоџа – Движење БЕСА.