Дури 126 новозаразени со мали сипаници се регистрирани минатата недела, што е најмногу досега од почетокот на епидемијата. Повеќе од половината од нив се од внатрешноста на земјата.

Досега бројот на заболени со морбили е 961 од кои над сто се лекари и медицински персонал. На Инфективна се хоспитализирани 43 заболени а 11 деца има на Детска клиника. На Комисијата за заразни болести во вторник ке одлучат дали ќе прогласат епидемија во цела држава.

Сезонскиот грип стивнува, морбилите се шират, известуваат од Институтот за јавно здравје. Морбилите се раширени во 19 градови во Македонија, а активни епидемии на мали сипаници има во шест здравствени региони – Скопје, Тетово, Куманово, Гевгелија, Кичево и Струга.

Како што соопштуваат од Државниот санитарен и здравствен инспекторат, 11 родители  завршиле на суд, а останатите девет платиле парична казна која се движи од 300 до 650 евра.

Инаку се уште е на сила забраната за примање во градинките, а од мај на уписите ќе се бара и потврда за вакцинирани деца, при упис во основно образование, оние кои несе вакцинирани нема да може да се запишат во училишште.

Минатата недела Министерот за здравство Венко Филипче посочи дека до сега против морбили се вакцинирани околу десет илјади невакцинирани лица.

Дали вакцинацијата треба да биде право на избор – ќе се расправа во Собранието по претседателските избори. Изборната кампања ја одложи седницата  Собраниската комисија на 4 април, на која требаше да се расправа за оваа иницијатива, која ја поднесоа стотина граѓани. 

Граѓаните кои ставија потпис на иницијативата за укинување на задолжителната вакцинација велат дека се додека не се сигурни какви вакцини примаат нивните деца ќе водат битка со здравствените власти.

„Да биде дозовлено родителот да одлучи кога ќе вакцинира и истата вакцина која ќе биде наложена на детето да се вакцинира да има поткрепеност од каде доаѓа да биде сигурно што содржи внатре и луѓето да бидат сигурни и да престане оваа игра во здравството, каде што е поминат рокот, не е поминат рокот, сето тоа сакаме да бидеме срочено и да биде како што треба тогаш луѓето ќе почнат да имаат некоја сигурност за да ги вакцинираат своите деца“ – изјави Елена Павлеска – Предлагач на иницијативата.