Италијанските власти денеска соопштија дека како последица од коронавирусот починало уште едно лице а со тоа вкупниот број на починати сега изнесува четири лица.

Станува збор за 84-годишен маж од Ломбардија. Лицето било со хронични болести и хоспитализиран во Бергам пренесува италијанската агенција Анса.

Досега во Италија од новиот коронавирус наречен Ковид-19 се заразени 165 лица, и тоа претежно во покраините Ломбардија и Венето, во северна Италија. Вчера властите превземаа мерки за заштита така што ги откажаа сите јавни настани меѓу кои и карневалот во Венеција.

Според последните податоци, до сега од новиот коронавирус, починаа 2.619 лица, а заразени се повеќе од 79.000.

Вирусот почна да се шири и надвор од Кина, каде беше регистриран првиот заболен, па до сега надвор од границите на Кина потврдени се 27 смртни случаи, од кои најмногу – осум во Иран и седум во Јужна Кореја, пренесува Си-Ен-Ен.

Вчера Турција поради бесбедносни причини ја затвори границата со Иран.

До сега најмногу заразени на дневно ниво има во кинеската провинција Хубеј, од каде што почна да се шири вирусот.

Иако е смртоносен за лицата со хронични болести, и шири паника сепак до сега од коронавирусот се излекувани 24.000 лица.

Надвор од границите на Азија, најмногу заболени има во Италија – 152, каде што се регистрирани и четири смртни случаи.