Еден од најгласните критичари на Шведска за националната стратегија за борба против коронавирусот тврди дека недостатокот на критичко размислување и од здравствените агенции и од шведските медиуми е создадено од „секта“  што доведе до непотребни смртни случаи.

Лекарот и професор за инфективни болести Бјорн Олсен рече дека Шведска би можела да избегне многу негативни последици доколку беа превземени посилни рестрикции многу порано, вклучително и карантин за патниците кои се враќаат во земјата, претходна блокада и препорака да се носат маски.

Олсен е гласен критичар на стратегијата на Агенцијата за јавно здравје за време на пандемијата со корона вирус и еден од 22-те научници кои редовно повикуваа на негова промена преку написи во шведските медиуми, пренесува порталот Thelocal.se.

„Премногу луѓе умреа пред своето време. Тие умреа од вирус што не требаше да се шири неконтролирано“, рече тој во програмата на шведското радио. Имено, тоа е шоу во кое гостите имаат еден час да бидат домаќини на емисијата.

Тој додаде дека нема „доволно време“ во едночасовната програма за да се наведат сите грешки направени од шведската агенција за јавно здравје.

„Сектизмот е опасен и многу медиуми беа верни проповедници на сектата околу шведската стратегија. Групите имаат корист од тоа да имаат адвокат на ѓаволот во собата, испитувач кој ги оспорува гледиштата на групата. Ова јасно недостасуваше кога Агенцијата за јавно здравје ја карактеризираше пандемијата на корона како обичен грип “, рече Олсен.

Државниот епидемиолог Андерс Тегнел, кој стана лице на оваа стратегија, претходно исто така беше домаќин на ова радио шоу.

Тегнел рече дека премногу луѓе умреле во Шведска, додавајќи дека земјата ќе мора во иднина да размисли дали постои начин да се спречи толку висока стапка на смртност.