Професорката на Правниот факултат во Скопје Тања Каракамишева се огласи на социјалните мрежи поради изјавата на Денко Малески кој во изјава за една бугарска национална телевизија вели дека Крсте Петков Мисирков и Гоце Делчев се Бугари и дека ние мораме тоа да го прифатиме за да немаме вето од Бугарија во евроинтеграцискиот процес.

Каракамишева вели дека се срами што го познава Денко Малески и поради тоа што тој треба да биде наш учител и просветител на Македонскиот народ.

Се срамам што бил мој колега на Факултет.
Намерно не напишав професорот оти е срам за Македонскиот народ тој да биде наш просветител и учител.

Кога не знае да молчи за работи што очигледно не ги познава, ниту има стручност да зборува за историја, а неговите зборови ни нанесуваат директна штета нам Македонците, тогаш јавната осуда е неопходна, напиша професорката Каракамишева – Јовановска на Фејсбук.

На социјалните мрежи реагираше и екс лидерот на ВМРО-ДПМНЕ, Никола Груевски во кој напиша дека воопшто не го изненади интервјуто на професорот Денко Малески за бугарската телевизија, ниту пак бугарските барања преточени во документ на ЕУ како услов Македонија да може непречено да ги води преговорите и да се зачлени во ЕУ

Ќе се задржам на ставовите на г. Малески, бидејќи тој отсекогаш бил “јастребот” на отстапките на левицата. Не знам, можеби и сам си ја доделил таа улога, но секогаш кога левицата во Македонија треба да направи отстапки на национален план г. Малески претходно со свои изјави како да прави подготовки на јавноста за истото.
Во сите до сега слични ситуации, тој е на страната на оној кој ни отвора проблем или бара некоја национална отстапка, односно се согласува со нивниот став, или затоа што е “убеден” дека другата страна е во право, или затоа што смета дека сме помали и во понеповолна ситуација и подобро е да попуштиме, вели Груевски.