Водачот на Северна Кореја Ким Јонг Ун го поздрави „големиот успех“ во борбата против корона вирусот, но предупреди дека мерките не треба да се олеснат „предвреме“, објавија денеска локалните медиуми, кои сугерираат дека земјата нема наскоро да ги отвори своите граници.

Ким зборуваше на партиската средба за вирусот корона, додека Северна Кореја ги затвори границите и воведе карантин пред шест месеци.

„Планиравме детално да го спречиме ширењето на овој подмолен вирус и одржувавме стабилна анти-епидемиолошка состојба и покрај глобалната санитарна криза“, рече Ким, пренесува КЦНА.

Според него, „големиот успех“ е постигнат благодарение на планирањето на раководството на централниот комитет на партијата и остриот дух на волонтерството.

Ким додаде дека нацијата треба да остане во „најголема подготвеност“, особено поради новите фокуси на вирусот корона во соседните земји.

Водачот на Северна Кореја потврди дека предвременото олеснување на мерките ќе доведе до „незамислива и непоправлива криза“.

Земјата нема пријавено никакви случаи на инфекција со коронавирус, но многу експерти се сомневаат дека никој не се заразил откако вирусот се појавил во соседна Кина, а потоа се шири низ целиот свет.

Северна Кореја воведе драстични мерки, ги затвори своите граници и воведе карантин. Експертите на ООН предупредуваат на недостиг на храна во земјата поради затворените граници.