СЗО се уште не располага со целосни податоци за потеклото на коронавирусот, нагласи  регионалниот директор на Светската здравствена организација за Европа, Ханс Хенри Клуге.

Тој посочи дека кинеските научници се занимаваат со откривање на прашањето дали вирусот настанал по природен пат а СЗО е повикано само да учествува во истражувањето.

-Сето тоа е во тек, секако, и е нешто што е многу важно да го дознаеме. Но не можам да кажам ништо повеќе бидејќи не сакам да го загрозам овој многу важен процес. Најважно е дека ние сме дел од тоа, рече Клуге во интервју за руската агенција Тасс. 

Експертот на СЗО рече дека проблемот е што пандемијата ги затекнала неподготвени и посочи дека е прашање на време кога ќе се појави нова.

-И оваа ја предвидовме, но повторно не затекна неподготвени, наведе тој, додавајќи дека нова пандемија секако ќе има, но сите ние треба подобро да бидеме подготвени за неа.

Според најновите податоци, во светот со новиот коронавирус до сега се заразени 33.385.696 лица. Од последици од Ковид-19 починале 1.003.405 пациенти, а оздравеле 24.688.610 луѓе.