Просветниот инспектор Ѓорѓи Илиевски, откри скандал каде со злоупотреба на својата положба министерот за образование Арбер Адеми и заменик-министерот за внатрешни работи Агим Нухиу противзаконски биле избрани во наставно-научни звања на Државниот тетовски универзитет, бидејќи во тоа време вршеле јавни функции. За овој случај инспекторот Ѓорѓи ги известил и премиерот Заев, анти-корупциската комисија, но и амбасадите на земјите членки на ЕУ во Македонија. Во самиот скандал не само што постои морална одговорност за неотповиклива оставка на министрите Адеми и Нухиу, туку има основи и за кривична одговорност за злоупотреба на службена положба и овластување (член 353 од КЗ), за што и двајцата би можеле да бидат осудени со затворски казни од 6 месеци до три години.

Инспекторот Ѓорѓи открива дека заменик-министерот Нухуи неколку пати го контактирал од различни телефонски броеви, при што му се заканил да не излегува во јавност со наводите што ги утврдил. “Се зaкaнyваат, пази имаш семејство внимaвај, имаш деца. Да има и такво нешто. Тоа е нискa работа, тоа се ниcки работи кога ќе слушнеш од заменик-министер за внатрешни работи – рече Илиевски за ТВ Алфа!.

Уште повеќе што откривањето на овој скандал се случува токму во моментот кога премиерот Заев специјално отпатува до Берлин за да ја убеди канцеларката Меркел дека Македонија е правна држава во која се случуваат добри реформи, и која заслужува датум за преговори со ЕУ. Но, замислете во Германија, во владата на Меркел, некој просветен инспектор да открие незаконски стекнати звања на Ања Карличек, министерката за образование, или на Хорст Зехофер, германскиот министер за внатрешни работи? Тоа ќе биде скандал, кој 24 часа по откривањето ќе ги принуди министрите да поднесат оставка. И замислете во текот на скандалот и откривањето да се дознае дека министерот за внатрешни му се заканувал на инспекторот што му го открил скандалот? Тогаш тоа ќе биде мега скандал кој ќе резултира со активирање на обвинителството и судски процес против министрите. Но, тоа е Германија, земја со силен демократски капацитет, со критични медиуми и со висока граѓанска свест за еднаквоста пред законите. 

Во Македонија е обратно. Наместо владата, медиумите и институциите да го поддржат и да го пофалат просветниот инспектор Ѓорѓи Илиевски за неговата смелост во едно вакво општество да го открие скандалот за незаконските научни звања на двајца влијателни владини министри, на крајот ќе испадне дека инспекторот е виновен што си го пикал носот кај што не треба. Како поинаку да се разбере замолницата од министерот за образование Адеми кој побарал од инспекторот да го сокрие случајот од јавноста? Како поинаку да се разберат заканите кои заменик министерот за внатрешни работи Агим Нухиу му ги испраќал на инспекторот Ѓорѓи и на неговите деца? Кога ова би го знаела канцеларката Меркел, Македонија никогаш не би добила ни датум за преговори, ни надеж за членство во ЕУ. Но, Заев сигурно нема да ја замара госпоѓа Меркел со некојси тврдоглав просветен инспектор, кој смета дека законот треба да важи и за министрите, туку ќе и објаснува за гулашот на Груевски, за про-руските будалаштини на Јанко Бачев, за смелоста на Крсто Мукоски да отвори врати, за бизнис капацитетот на Кочо Анѓушев, за анти-западната опозиција и за блескавиот договор од Преспа. Заев ќе верува дека ја убедил и прелажал Меркел, а Меркел ќе се прави дека не разбира и ќе му дозволи да се чувствува задоволен. Така некако ќе заврши денешната средба и ќе продолжи ова мачно статус-кво во Македонија, која прави чекор напред, а потоа два назад.

Во меѓувреме, министрите Адеми и Нухиу порачаа дека не чувствуваат никаква одговорност за овој случај, додавајќи дека за процедурата во однос на која стекнале наставно-научни звања надлежен е универзитетот. Тие се од ДУИ, тие се неказниви, за нив законите не важат. Така и ќе остане!