Работиме на намалувањето на цената на зелениот картон за осигурување на возилата при патување во странство, најави вчера премиерот Зоран Заев, на граѓанската трибина „На прав пат“ во Куманово.

Премиерот додаде дека за намалувањето на цената на зелениот картон на ниво на земјите во регионот се преговара со осигурителните компании, како и за сè она што претставува трошок во зелениот картон.

– Сакаме да го намалиме зелениот картон, сакаме да ги поедноставиме патарините, што се плаќаат за патишта, сакаме да ја рационализираме и поедноставиме регистрацијата на возилата и со тоа да им заштедиме на граѓаните од трошоците, да им вратиме пари назад на граѓаните, порача тој.

Инаку сега зелениот картон кој можеда го купат возачите за една година за возила до 66 киловати чини околу 60 евра, а за возила над 66 киловати е 90 евра.

Пред три години односно во 2016 година беше воведен еден новитет односно возачите имаат можност да купат и  едномесечен зелен картон кој за патнички возила до 66 киловати чини 30 евра, додека неговата цена за возилата над 66 киловати е 50 евра.

Според информациите, македонските осигурителни компании годишно издаваат од 100.000 до 130.000 зелени осигурителни картони. Овој документ се издава врз основа на полисата за осигурување од автомобилска одговорност и е замена за полисата за осигурување од автомобилска одговорност издадена за матичната земја со важност за сите земји- членки наведени во полисата.