Внатрепартиски извор за магазин открива дека на наредниот состанок на ЦК на ВМРО-ДПМНЕ кој треба да се одржи во средата ќе се одлучи конечно кои ќе бидат носители на листите во шест изборни единици низ Македонија. Ексклузивна информација е тоа што лидерот на партијата – Христијан Мицкоски најверојатно нема да биде носител на ниту една листа од изборните единици. Тоа значи дека, доколку ВМРО-ДПМНЕ ги изгуби овие парламентарни избори, Мицкоски ќе се збогува со својата политичка кариера бидејќи нема да стане ниту пратеник.

Овој гест на Мицкоски во ВРМО-ДПМНЕ го толкуваат како смел и лидерски, бидејќи на тој начин Мицкоски покажува дека оди на се или ништо. Тој нема да прифати помала функција од премиерската, а поразот на изборите ќе го сфати лично и во чест на својата партија и своите гласачи ќе си даде морална оставка од сите функции во ВМРО-ДПМНЕ. 

Меѓудругото, нашиот извор открива дека Рашела Мизрахи ќе биде најсилниот адул на ДПМНЕ на престојните избори. Таа дури и ќе биде носител на изборна единица. Мизрахи успеа да ја заинтригира јавноста поради тоа што одби да ја промени таблата на која пишуваше „Министерство за Труд и Социјална Политика на Република Македонија“ дури и по цена да плати казна во висина од 5.000евра и да биде разрешена од функцијата – технички министер за труд и социјална политика. По реакции од нашиот јужен сосед заради употребата на името „Република Македонија“ во институционален контекст, техничкиот премиер – Оливер Спасовски предложи разрешување на министерката – Мизрахи. На собраниска седница, таа беше разрешена. Неколку говори на Мизрахи силно одекнаа во јавноста, особено оној говор каде што истакнува: 

Почитувани пратеници не ја прашувајте Рашела Мизрахи, прашајте ја Мила каде е новата табла. Јас сум граѓанин на Република Македонија кој никогаш не го прекршил ниту Уставот ниту законите. А Република Македонија е таа затоа што за неа на деветнаесет години загина народниот херој Лиман Каба, Република Македонија е затоа што Бабисадо Хамезе за неа изгуби нога во втората светска војна, Република Македонија е затоа што мојата баба Ризова Трајанка и нејзината бригада „Добри Даскалов“ пет години крвареа. Поради Коста Солев Рацин, Македонија е поради Јордан Пиперката, Даме Груев и Карев. Република Македонија е затоа што нејзината иднина лежи на нејзината историја. А без историја нема иднина. Реалноста денес е дека парламентарното мнозинство ја заборави историјата, барајки иднина. Јас сум Рашела Мизрахи горда Еврејка од Македонија.

Со неколку говори и гестови, Мизрахи ги освои симпатиите на македонските граѓани и таа со право ќе биде најсилниот адут на ДПМНЕ во трката за власт. 

Магазин открива и неофицијални податоци за носители на листи во други 4 изборни единици. Еве ги загарантираните пратеници од ВМРО-ДПМНЕ:

Носител на ИЕ1 – Гордана Силјановска 

Носител на ИЕ2 – Рашела Мизрахи 

Носител на ИЕ3 – Сашко Кедев 

Носител на ИЕ4 – Александар Николовски 

Носител на ИЕ5 – Игор Дурловски 

Носител на листата на ИЕ6 не му беше познат на нашиот извор. 

Станува збор за неофицијални податоци и шпекулации. Но со однос на тоа дека тие произлегуваат од извор кој е близок со раководството на партијата, најголем дел од нив ќе се потврдат на состанокот на ЦК во среда.