Бројот на заболени од коронавирус во државава постојано се зголемува. Министерот Венко Филипче вчера изјави дека Македонија со 555 заболени влегува во втора фаза и се очекува во следните недели овој број да продолжи да се зголемува. Најмногу заболени има во Скопје – 235, Куманово – 114, Дебар – 49. Бројот на починати лица како последица од Коронавирус достигна 18, а 23 се излекувани.
Вчера министерот за здравство Венко Филипче најави можни нови мерки за превенција за натамошно ширење на вирусот. Тој рече дека денеска ќе имаат дополнителна дискусија во рамки на Комисијата за заразни болести.
– Се наоѓаме во критичниот момент со очекуван раст на бројот на заболени од Ковид-19. Очигледно е дека влеговме во втората фаза на пандемијата со коронавирусот. Бројот на заболени во деновите пред нас дополнително ќе расте. Се уште остануваат прогнозите пикот на болеста да биде на крајот на месецов и очекуваме 2.000 пациенти, иако многу фактори влијаат на овие предвидувања, истакна Филипче и апелираше граѓаните максимално да ги почитуваат мерките, физичките контакти да ги сведат на минимум и да се штитат од секоја ризична комуникација или движење.
Еден од главните проблеми, според него, е што има асимптоматски носители на вирусот, а ширењето на овој начин од овие носители може да се спречи само со седење дома, односно со изолација.
Од 555-те заболени од коронавирусот, 52 (9,5 проценти) се здравствени работници. Филипче им порача на здравствените работници максимално да ги почитуваат протоколите кои ги има од самиот почеток на пандемијата, да се штитат во и надвор од работните места, затоа што нивната улога, нивното здравје е од примарно значење во овој момент во државата.
»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.
You must be logged in to post a comment.