-Не е точно дека Скопје редовно се наоѓа меѓу петте најзагадени градови во светот, вели заменик министерот за животна средина Јани Макрадули, кој тврди и дека не се точни податоците од мерењата на воздухот, кои често пати се појавуваат на социјалните мрежи. Податоците од, како што вели Макрадули, „Али експрес“ сензорите, непотребно прават паника меѓу луѓето.

Заменик министерот за животна средина, Јани Макрадули уверува дека загадувањето на воздухот е значително намалено и дека не треба да им се верува на, како што ги нарече „Али Експрес“ сензорите бидејќи тие само предизвикуваат паника помеѓу граѓаните

Според него мерењата од државниот мониторинг центар покажуваат значително почист воздух во последните 3 месеци. Макрадули вели дека не се точни податоците кои се се пласираат на социјалните мрежи и дека Скопје не се наоѓа на топ 5 листата најзагадени градови.

Макрадули ја најави новата програма „Јас не загадувам“ која што ќе се спроведе во државните институции и дека ќе се исфрли горивото кое допринесува во аерозагадувањето. Како еден од главните загадувачи се смета индустријата, а утре ќе се одржи расправа во собрание каде што ќе се разговара за измената на законот за увоз на отпад кој се користи како енергенс. Политичката партија ДОМ и невладините организации бараа да се забрани увозот на алтернативните горива бидејќи државата нема капацитет да го контролира процесот.

Денеска во градинката „Пролет“ во Општина Карпош, беше пуштена во употреба термална печка со кој беше заменет стариот систем кој користеше нафта како извор на топлина.