Во државата Викторија, бројот на заразени случаи не се намалува со очекуваното темпо, па затоа денес беше донесена одлука за продолжување на строгите итни мерки до крајот на септември.

Премиерот на Викторија, Даниел Ендрус денес го продолжи времетраењето на строгата вонредна состојба до 28 септември и претстави план за постепено ублажување на ограничувањата во следните два месеци, објави Ројтерс.

„Засега, не смееме да ги олеснуваме ограничувачките мерки затоа што многу брзо би ја изгубиле контролата“, рече Ендрус на прес-конференција.

Втората по бројност држава во Австралија, Викторија, е епицентарот на вториот бран на епидемијата, а во моментот има 75% од вкупниот број на заразени лица во Австралија.

Во последните 24 часа се регистрирани околу 60 нови случаи, вкупно 26.282 низ Австралија.

Најнаселената австралиска држава Нов Јужен Велс има значително помалку нови инфекции од Викторија.