Германската канцеларка Ангела Меркел денеска се врати во својата канцеларија по двонеделниот домашен карантин, изјави нејзиниот портпарол, Стефан Сијберт.

Тој рече дека Меркел била тестирана неколку пати за вирусот корона и дека резултатите биле „за среќа негативни“.

Меркел влезе во домашен карантин на 22 март, откако беше известена дека докторката која и ја дала вакцината, била позитивна на вирусот корона.
Два дена порано, таа доби превентивна вакцина против пневмококна инфекција.

Од дома, Меркел водеше состаноци на владата и учествуваше на домашни и меѓународни видео конференции.

Бројот на лица заразени со коронавирусот на светско ниво веќе е поголем од еден милион, поточно 1.034.170. Бројот на излекувани, пак, е околу една петтина од тој број и изнесува 220.025, додека вкупниот број на починати е 54.465. 

Соединетите Американски Држави веќе неколку дена се на врвот на листата кога станува збор за бројот на заболени, па сега има 245.442 Американци заразени со новиот коронавирус.