Во вчерашното гостување во емисијата „Заспиј ако можеш“ на Алфа телевизија, Рашела Мизрахи, поранешниот технички министер за труд и социјала, сега кандидат за пратеник од редовите на ВМРО-ДПМНЕ во втората изборна единица, ја прокоментира видео снимката која излезе во јавноста како голем скандал на Ден Дончев, и истакна дека во сред пандемија имаме десетици илјади граѓани без здравствено осигурување, тотална недоверба на граѓаните кон институциите и системот предизвикуваат ваквите случаи како постапувањето на директорот на Фондот за здравство.

-Веројатно е дека некој не сака намерно да имаме систем кој функционираа, во случајот со ФЗО, имаме ваква снимка и слушаме тоа што слушаме, а во ниеден момент не се спомнува колку граѓани во овој момент немаат здравствено осигурување, вели Мизрахи.

Мизрахи потенцираше дека со овие снимки само се зголемува недовербата на граѓаните во системот за здравство кој реално не функционира.

Таа се осврна и на ситуацијата со вирусот и големиот број на заразени со кој секојдневно се соочува здравството. Мизрахи крикуваше за мешање на моделите за справување со коронавирусот на здравствените власти кои, како што вели, направиле хаос во состојбата со вирусот.

-Ова е мешање на модели за справување од кои се направи хаос, генерално народот не верува на бројките кои ги слушаме секој ден, на бројот на заболени и смртни случаи, се верува дека се кријат податоци, тотално хаотична ситуација, вели Мизрахи, додавајќи дека не верува дека ова е втор бран, туку прв бран, како и тоа дека ако власта веќе решила да оди на спонтана имунизација на населението, треба да се направи анализа, да се видат капацитетите во првостепеното, секундарното и терцијарното здравство, како и помошниот персонал, како и она што се располага од опрема, да се направи план за да може да се очекува и тој втор бран. Во овој момент со над 700 медицински работници заболени од Ковид ние немаме шанси да се справиме со никаков бран, ни овој, ни наредниот, потенцираше Мизрахи.