Реално, многу размислувам дали да се кандидирам. Тоа дали, оди со прашањата како, со кого и каде.

Предлозите од типот “направи партија, ние ќе те гласаме“ се неизводливи, дури би рекол и несериозни. Оти тоа подразбира процес кој јас не сум способен да го изработам.

Преку партија да се кандидирам е возможно, но прашањето е преку која, земајќи предвид дека сите до една (а и нивните лидери) со години ги критикувам, и со најголемиот дел од нивните постапки и планови не се согласувам.ж

Каде, односно во која изборна единица да се кандидирам, исто така е прашање за размислување.
Но, ете, да си останам јас со своите дилеми и размислувања, па да видиме што ќе биде.
Но, ДОКОЛКУ СЕ КАНДИДИРАМ, однапред кажувам дека платата за пратеничката функција нема да ја земам. Нема да не ја земам од државата, оти не сакам да оди во буџет каде ојлевци и дојлевци ќе се расшетуваат низ светот продавајќи ја Македонија и Македонскиот народ, а разни Миридизели ќе прават богатства на фиктивн трошоци за превоз.
Не, платата ЈАС НЕМА ДА ЈА ЗЕМАМ за мене лично, и тоа ниту една од претпоставените 48 плати за 4 години.

Ами ќе направам договор, полната сума, СЕКОЈ МЕСЕЦ да биде префрлана на сметката на по едно различно социјално загрозено семјество (или социјален случај, или напуштен малолетни деца или слични трауматични судбини) ОД ОНИЕ ШТО СЕ ВО ИЗБОРНАТА ЕДИНИЦА КАДЕ БИ СЕ КАНДИДИРАЛ.
Значи, за 48 месеци, на 48 РАЗЛИЧНИ социјално загрозени случаи (семејства, деца, онемоштени…) ќе им бидат префрлени моите 90-тина илјади денари како помош.
Јас пратеничката позиција би ја сфатил како должност и обврска, а не како место за земање пари за нереализирани патни трошоци, или за изигравање на многудетна нео-буржузаија, или за загосподарување со најголемиот хотел во градот, или за вработување се живо што мрда низ куќа, плус роднини, комшии, сватови и школски другари…

Не, јас би сакал да бидам слуга на народот. Сиромав, или без пари, исто како и мојот народ. Моите 90.000 многу би ми требале сите 48 месеци (4 години), ама мислам дека има најмалку 48 случаи во изборната единица на кои им требаат повеќе од мене.

Миленко Неделковски