Портпаролот на Владата, Миле Бошњаковски, во појаснување на изјавата дадена од министерот Никола Димитров, дека македонскиот јазик не се однесува на Македонците во Грција, денеска даде дополнително објаснување за народните херои кои се бореле за Македонија, а биле родени во денешна Грција. Прес конференцијата за Гоце Делчев и Крсте Петков Мисирков ви ја пренесуваме во целост:

Почитувани,

во однос на нашиот херој Гоце Делчев, Владата е на ставот дека Гоце е роден во национално семејство во градот Киликис, чии што родители Никола и Султана припаѓале на одредена категорија на население која што не зборувала на грчки јазик, но не е според европските стандарди нашата влада да се меша во тоа каков јазик говореле Гоце Делчев, неговите родители, и неговите браќа и сестри. Тоа си е домашна работа на Гоце Делчев и ние не сме тие што ќе детерминираме кој каков јазик си зборел по дома.

Истото се однесува и на Крсте Петков Мисирков, национален деец роден во селото Пела, чии родители исто така припаѓале на одредена категорија на население која што не го зборувала грчкиот јазик, што не го спречило Крстета да се залага за литературна кодификација на неговиот мајчин недетерминиран јазик, што си е негова приватна работа и тој потоа приватно си ја објавил книгата “За Националните работи“.

И ќе повторам, тоа што министерот Димитров го кажа е јасно како бел ден. Членот 7 од Договорот од Преспа укажува дека и Крсте Петков Мисирков и Гоце Делчев припаѓаат на категоријата на население кое не зборува на грчки јазик, туку говори на друг јазик чии што термини имаат посебно значење за нас, а посебно значење за Република Грција и нивното детерминирање од наша страна би било перцепирано како бихевиорализам спротивен на билатералниот прогрес. Се надевам дека се е јасно!