На 7-ми мај  2019, Магазин објави текст со наслов “Никола Димитров ‘си бега‘ во јуни, од земјата на која и го смени името“ во кој напис ги изнесовме нашите сознанија од дипломатски извори, дека министерот за надворешни работи Никола Димитров наскоро ќе ја напушти Македонија и заминува на ново работно место како виш советник и аналитичар во “Брукингс Институтот“ во Вашингтон.

Ги објавивме и сознанијата добиени од истиот дипломатски извор дека министерот остварил и неколку разговори со одговорниот менаџер на овој истражувачко-политички институт, за позицијата, за работните обврски, како и за месечната плата која би му изнесувала околу 12-14.000 долари бруто. Димитров оваа своја бекап опција му ја соопштил и на премиерот Заев на почетокот на март оваа година, откако видел дека дефинитивно тој нема да биде кандидатот на власта за претседател на државата, понуда на која искрено се надевал и ја очекувал после ставањето на својот потпис за “Северна Македонија“ на Преспанскиот договор.

Во ваквата објава министерот Димитров препознал “говор на омраза, неточно и нефер информирање, нарушување на приватноста, навреда и клевета“ по што уште следниот ден поднел жалба до Советот за етика во медиумите. Комисијата за вакви жалби, во состав Мирче Адамчевски, Сефер Тахири, Мери Јордановска, Теофил Блажевски, Лилјана Илиеска и Ердем Ахмет, истата ја прифатила како основана, согласно членовите 1 и 13 од кодексот на новинарите, кои се сметаат за повредени.

Магазин како портал ја цени одлуката и образложението на истата, но исто така сметаме дека јавните личности како што се министрите, пратениците, градоначалници и други, треба да покажат повисоко ниво на толеранција за сознанијата кои се објавуваат за нив, а чии извори (во случајов дипломатски извор) инсистираат да останат неоткриени. Јавноста и во такви случаи има право да дојде до добиената информација и да просуди за нејзината релевантност или веродостојност. Впрочем, времето најдобро ќе покаже дали и колку се точни добиените дипломатски информации дека министерот Никола Димитров има бекап опција за работен ангажман и кариера надвор од МНР и надвор од Македонија, ова лето, оваа година, или пред истекот на неговиот мандат. Читателите се сепак најбитни во соопштувањето на нашите информации и Магазин ќе продолжи да го следи тој принцип како свој приоритет.