Христијан Мицкоски во интервју за телевизија Алсат, додаде дека не е исклучена можност опозицијата да организира мирни протести, а денеска портпаролот на ВМРО-ДПМНЕ рече дека нивната партија е секогаш подготвена за предвремени парламентарни избори.
Лидерот на ВМРО ДПМНЕ, Христијан Мицкоски во интервју за Алсат рече дека треба да се седне, да се повикаат пратеничките групи и да се организираат предвремени парламентарни избори. Граѓаните нека одлучат дали овие политики на политичари ќе ја добијат поддршката или ќе дојде некоја нова генерација на политичари.
На прашање од новинарот дали се можни протести и порадикални мерки, Мицкоски, одговори дека секогаш организирање на мирни протести се опција за било која опозиција, без разлика дали во таа опозиција ќе биде само ВМРО-ДПМНЕ или и останатите опозициони партии.
Во однос на Преспанскиот договор и како ќе постапи ВМРО-ДПМНЕ доколку дојде на власт, Мицкоски рече дека ставот на партијата за договорот останува ист.
– Рековме дека ова е капитулантски договор и задира директно во посебноста на македонскиот народ, нација и во македонската држава. Потребно е да се спомене фактот дека за да се случи чекор назад, правно и легалистички за што се бори и залага ВМРО-ДПМНЕ, на нас ни се потребни 80 пратеници во Собранието и услов од Бадентер. Се што е надвор од тоа ќе биде обична лага, конструкција и обид за манипулација, изјави Мицкоски.
Исто така на прашање дали е можен договор за Законот за јавно обвинителство, тој изјави дека нема амбиент во државата за да функционира политичкиот дијалог меѓу позицијата и опозицијата.
– Во овие услови вакви, какви што се. Под политички прогон и терор, конструирани обвиненија, нарачани пресуди и прогонот што се прави врз ВМРО-ДПМНЕ, врз сегашни и поранешни функционери, едноставно нема амбиент. Не е само законот за ЈО на маса, сега на маса треба да се најде и темата кога предвремени парламентарни избори, изјави Мицкоски.
»Вестите на порталот MAGAZIN.MK може да се користат исклучиво за лично информирање. Без писмена дозвола од порталот или посебен договор, не е дозволено превземање, користење или реемитување на вестите, во спротивно ќе следи фактурирање на име "плагијат" во вредност од 20.000 денари.
You must be logged in to post a comment.