Дозволете ми, во мое лично име и во име на ВМРО-ДПМНЕ, на сите православни христијани во Македонија да им го честитам големиот христијански празник Богојавление – Водици.

Овој празник на крштевањето на Исус Христос во светите води на реката Јордан ја има симболиката на духовното раѓање и прочистувањето.

Овој ден ја носи пораката на големата верба и надеж дека секое искушение и предизвик може да биде надминат ако сме водени од љубовта кон Бога, љубовта кон своите ближни, кон нашите пријатели и соседи.

Само во духот на милосрдието и посветеноста кон добрите дела, ќе црпиме сила за заеднички да го постигнеме напредокот на нашата татковина Македонија.

Вербата и сплотеноста, велат, планини поместуваат. Нашиот предизвик е заедно со народот оваа апатичност, безнадежност и секојдневните порази со кои денес живееме, да ги замениме со перспективност, развој и среќа на граѓаните. Нашата цел е да ја промениме тажната реалност, која поради нивната неодговорност и неспособност, елитите ја претставуваат како неизбежност.

Минатото нè учи дека ако се сака и ако се има верба во капацитетот на сопствениот народ, може да се направи подобро утре. Традицијата и заедничките вредности покажале низ историјата дека можеме заедно да градиме подобра иднина за сите.

Нека денешниот празник донесе мир, спокој, добро здравје и бериќет за сите во Македонија.
Бог се јави!
Нека е честит и за многу години големиот христијански празник Богојавление – Водици!

Христијан Мицкоски