„Ќе се осврнам на понудата која што навистина ќе биде новитет и атрактивна за македонските граѓани, обидот да бидеме пионери или меѓу првите во регионот кои што ќе понудат таков пристап во трговијата со крипто валутите и „Blockhain“ технологијата, нешто што денеска многу млади луѓе не само во Македонија туку и во регионот, Европа, САД претставува сериозен исчекор кон иднината.

Да одиме кон иднината, а не пасивно да ја чекаме таа иднина, за тоа што ако пасивно ја чекаме иднината никогаш нема цврсто да зачекориме кон иднината.

Ќе ве потсетам во 90-тите години кога се случуваше интернет револуцијата, технологијата на интернетот и револуцијата која што пристигна заедно со интернетот претпоставувам многумина кои што беа современици во тоа време малку веруваа дека тоа ќе биде успешен проект’, појасни претседателот на ВМРО- ДПМНЕ, Христијан Мицкоски на вечерашната трибина „Промоции на политики – Македонија за сите луѓе“ во општина Карпош.

Мицкоски додаде дека пред презентација на тоа како ВМРО-ДПМНЕ сака да се формализира и даде поддршка на крипто валутите би се осврнал и на корумпираното време во кое што граѓаните живеат по вина на власта предводена од СДСМ.

Ние сме апсолутно свесни дека пред нас се клучни и одлучувачки локални избори, за кои што најверојатно треба да зборуваме на многу локални теми и ќе зборуваме во деновиве кои што следат. Локалните теми многу зависат од начинот и пристапот во политиките н централната власт. Ако вие немате владеење на право, ако сте 111-тата држава на ранг листата на „Транспаренси Интернешнл“, ако сте вие најкорумпираната држава во Европа каде што имате најкриминализирани политичари во власта вие не можете да очекувате ниту странски, ниту домашни инвестиции кои што ќе креираат нови работни места, добро платени работни места, и луѓе кои што наместо да имигрираат и да се иселуваат од Македонија ќе останат тука“, нагласи Мицкоски.

Мицкоски потсети како власта промаши со ветувањето за 500 евра плата. Власта не овозможи пристојни услови за живот. За тоа ВМРО-ДПМНЕ преку планот и концептот и политиките „Македонија за сите луѓе“ умее и знае и развива методологија како до минимум просечна плата од 45.000 денари.

Мицкоски во текот на трибината за крипто валутите посочи дека ВМРО-ДПМНЕ ќе го формализира пазарот за крипто валути и со тоа ќе се овозможи над половина милијарда евра да завршат во Буџетот. Тоа се половина милијарда евра за образование, за инфраструктура, за болници.

Токму овој проект на ВМРО- ДПМНЕ ќе донесе развој на Република Македонија, овој проект ќе биде за  добробит за граѓаните и за државата. Наместо полиња со марихуана ќе имаме модерни технологии и повеќе пари за народот. ВМРО-ДПМНЕ нуди политики за 21 век, а СДСМ Македонија ја враќа со политики од 19 век.