Македонскиот премиер Зоран Заев кој моментално се наоѓа во официјална посета на САД, присуствуваше на дипломатски прием организиран од Доналд Трамп, во рамките на Генералното собрание на Обединетите нации.

Премиерот Заев беше придружуван од сопругата Зорица, додека 73-годишниот претседател на САД остваруваше средби заедно со сопругата Меланија.

Чест и задоволство ни беше со Зорица да присуствуваме на приемот организиран од Претседателот Трамп и првата дама Меланија, во Њујорк за време на ГС на ОН, напиша премиерот на социјалните мрежи.

Заев оствари исто така средба со Генералниот секретар на Обединетите нации, Антонио Гутереш.

На средбата со Генералниот секретар на Обединетите нации, Антонио Гутереш, уште еднаш ја потврдив заложбата на Северна Македонија за целосна поддршка на Целите за одржлив развој.

Владата е посветена на спроведување на Агендата 2030, што е во насока на превенција од насилните конфликти и тероризмот, како и од заканите што доаѓаат од климатските промени, миграциите и бегалските кризи, сајбер заканите и други хибридни закани за човештвото.

Му се заблагодарив за признанието за важноста на Преспанскиот договор во Годишниот извештај на Генералниот секретар на ОН, кој беше оценет како резултат на победата на дипломатијата и дијалогот и како пример дека споровите можат да се решаваат врз основа на партнерство и пријателство во име на заедничкиот интерес за просперитет на народите.