НАТО ја губи воената предност над Русија, поради што е покрената редефиниција на стратегијата на Алијансата, изјавил шефот на американската армија, генералот Џозеф Данфорд.

Тој присуствува на состанокот на Воениот комитет на НАТО, кој се одржал во Љубљана минатата недела, а теми на средбата биле Авганистан, Ирак и Косово.

Според соопштението кое официјално го издало американското министерство за одбрана, Данфорд изјавил дека Русија станала огромна воена закана, бидејќи официјална Москва направила многу за подобрување на своите одбранбени способности.

Сега предноста која ја имаше НАТО е “стопена“, додал генералот. Поради тоа, како што истакнува, потребно е што поскоро да се направи нова стратегија на НАТО.

Што е НАТО? 

Организацијата е сојуз на 29 држави и била создадена во 1949-та година како бедем против Советскиот Сојуз.

Според официјалната веб страница на Алијансата целта е „да се гарантира слободата и безбедноста на своите членки преку политички и воени средства.“

Кои држави се членки?

Првично НАТО се состоел од 12 членки: САД, Велика Британија, Белгија, Канада, Данска, Франција, Исланд, Италија, Луксембург, Холандија, Норвешка и Португалија. Други седумнаесет држави се приклучија подоцна на групата. Црна Гора е последниот член кој се приклучи во 2017-та година.

Според членот 10 од Вашингтонскиот договор, членството е отворено за секоја „европска држава која е во позиција да ги унапреди принципите на овој Договор и да придонесе за безбедноста на северно-атлантскиот регион.“

Која е целта?

Главната цел на НАТО е безбедноста и одбраната на земјите членки. Членот 5 од Договорот наведува дека „вооружен напад врз една или повеќе земји-членки се смета за напад врз сите нив“.

Одредбата за колективна одбрана беше повикана за првпат по нападите на 11-ти септември, 2001-ва врз САД. НАТО одговори на барање на САД за помош во војната против Ал Каеда во Авганистан. Алијансата го презеде водството во војната од август 2003-та до декември 2014-та година.

Кој го финансира НАТО?

Секоја членка плаќа одредена сума за буџетот на НАТО, врз основа на договорена формула. Но, САД покриваат речиси две третини од буџетот на Алијансата.

Повелбата на НАТО бара од земјите членки да трошат два проценти од буџетот во одбрана.

Според последната проценка на НАТО, објавена во јуни 2017-та година, само шест држави ја постигнале целта од два проценти: САД, Грција, Велика Британија, Естонија, Романија и Полска.