Најмалку 80 автомобили синоќа се опожарени во шведските градови Гетеборг и Тролхатен. Пироманите дејствувале истовремено во неколку реони.

Полицијата претпоставува дека акцијата најверојатно била координирана преку социјалните мрежи.

“Имавме период со големи пожари но во една иста вечер за толку кратко време да има пожар на многу различни места не памтам такво нешто.” – изјави портпаролката на полицијата во западна Шведска Ула Брем.

Според очевидците возилата биле потпалувани од луѓе облечени во темна облека и со качулки. Тие носеле канти со бензин и бејзбол палки со кои ги кршеле стаклата на автомобилите.

Полицајците кои им помагале на пожарникарите биле нападнати со камења.

Шведскиот премиер Стефан Ловен изјави дека е “навистина лут” и оти “општеството треба решително да реагира”.