Против Договорот од Преспа и „за да се спречи предавство на Македонија“ т.н. „Комитет за борба за Македонија“, на 20. јануари закажа протест на атинскиот плоштад Синтагма, јави МИА од Атина.

Формираниот „Комитет за борба за Македонија“, го сочинуваат четири организации од кои две припаѓаат на Грците од дијаспората, и преку соопштение го најавуваат протестот кој ќе се одржи на 20 јануари. Тие велат дека Грците „не отстапуваат ниту една буква од светото име на Македонија“.

– Владата вели дека Грците се убедени за придобивките од „договорот“. Да им докажеме дека прават грешка. Упатуваме општа покана до сите Грци да дојдат на уште еден голем собир во последен момент да се спречи предавство на Македонија, во недела 20 јануари, во 14:00 часот на Синтагма.

Тоа е единствениот демократски начин да не го донесат за гласање во парламентот. Но, ако се осмелат да го сторат тоа, повторно ќе бидеме таму, соопштуваат од „Комитет за борба за Македонија“.