По страотното невреме кое ја зафати Грција, поточно Халкидики, каде загинаа повеќе од седум лица, а над 100 се повредени, се огласи и министерот за надворешни работи на Северна Македонија, Никола Димитров.

Министерот изрази сочувство за настраданите од невремето на Халкидики на својот Твитер профил.

Во сочувството кое го објави на социјалната мрежа Твитер, Димитров вели дека е во неверување од ужасното невреме во областа Халкидики во Грција каде животот го загубила над седум туристи. 

– Изразувам најдлабоко сочувство до семејствата и најблиските. Ние сме подготвени да помогнеме за се што е потребно, наведува првиот човек на МНР, Никола Димитров.

За потсетување, на полуостровот Халкидики вчера беше прогласена вонредна состојба.

Телефонските и интернет врските беа прекинати на полуостровот, а МНР излезе со соопштение и изјави дека нема информации за повредени македонски туристи.

До овој момент нема информации за настрадани државјани на Северна Македонија во невремето што го зафати поширокиот грчки регион Халкидики, потврдија за МИА од МНР.Засега ниеден македонски државјанин не пријавил ниту штета од невремето. Во тек се дополнителни проверки од страна на надлежните институции.