Клаудија Волин,  е новинарка од Бразил која од 2003 година живее и работи во Шведска. Таа работи на репортажи а токму од неодамна објави една своја репортажа со која го заинтересира светот. Таа  опишува како изгледа животот на политичарите во оваа земја.

„Ова може да звучи чудно за луѓето кои живеат во други земји, но Шведска не нуди никаков луксуз или привилегии за своите политичари. Без службени автомобили или приватни возачи, шведските министри и пратеници патуваат во преполни автобуси и возови, исто како и граѓаните чии интереси ги претставуваат“, пишува Волин во својот текст.

Клаудија Волин, во својот текст додава дека политичарите во Шведска немаат право на пратенички имунитет. Таа посочува дека во оваа земја на политичарите може да им се суди како и на секој друг жител. 

„Јас сум оној кој ги плаќа политичарите“, вели Јоаким Холм, шведски државјанин од кого новинарката зела изјава. „Не гледам причина зошто ние како граѓани би им овозможиле луксузен живот“, додава тој.

Политичарите кои ќе се осмелат да трошат јавни пари за такси, наместо за возење со воз, завршуваат на насловните страници на весниците. Дури и претседателот на парламентот добива картичка за користење на јавниот транспорт, пишува Волин, а пренесува порталот „Индекс.хр“.

Волин во својата репортажа открива дека во оваа скандинавска земја само премиерот е тој кој може да користи лично обезбедување и да користи автомобил.