Унгарската влада денес ги ограничи посетите на продавниците за малопродажба во обид да ги изолира постарите клиенти и да го спречи ширењето на пандемијата на вирусот корона меѓу луѓето над 65 години, кои се сметаат за најранлива група.

Според новите мерки, лицата постари од 65 години можат да влегуваат во продавниците во работните денови од 9 до 11 часот, а за време на викендите од 8 до 10 часот, пренесува Гардијан.

Унгарскиот премиер Виктор Орбан во видеото, кое го објави на Фејсбук, рече дека ваквиот владин указ е донесен со цел да се заштитат старите лица.

– Статистичките податоци поврзани со пандемијата јасно покажуваат дека најзагрозени возрасни групи се нашите родители и баби и дедовци. Да се ​​грижиме за нив – изјави Орбан и додава Ројтерс.

Со месеци, Унгарија се обидуваше да избегне второ затворање и да спречи понатамошно оштетување на економијата, но беше принудена да ги затвори средните училишта и да воведе полициски час во траење од 20 до 5 часот наутро.

Во Унгарија, од почетокот на пандемијата на короната, од вирусот корона се заразени 177.952 лица, додека починале 3.891 лица, се вели во податоците на веб-страницата на „Worldometers“.