Иако вчера Советот на јавните обвинители  ги врати спцијалните обвинители на СЈО во своите матични обвинителства, тие денес повторно пристигнаа на работа во зградата на Рузвелтова.

Причината за нивното доаѓање на работа во зградата на СЈО, е тоа што државниот обвинител Љубомир Јовески ги задолжил специјалните обвинители да ги чуваат предметите кои ги застапуваа пред суд.

Имено по целата ситуација која се случи со СЈО, и по вчерашната одлука за враќање на обвинителите во своите обвинителства од каде беа донесени, Јовески ќе треба да одлучи за секој предмет поединечно, односно кое обвинителство е надлежно и кои обвинители ќе продолжат да ги застапуваат предметите пред суд.

Како што објави Фокус во игра се две опции како Јовески би можел да ја реши целата ситуација.

Првата опција е обвинителот Јовески да ги делегира досегашните обвинители, односно да им ги остави предметите да ги довршат, но втората опција е да се формира одделение во Обвинителството за гонење на организиран криминал и корупција, за што не се потребни законски измени. Тогаш би се разпишал конкурсн, на кој пак би можеле да конкурираат обвинителите од СЈО и да станат дел од тимот на Вилма Русковска.

СЈО досега има отворено десетици истраги и подигнато обвиненија против бројни политичари и државни функционери.